එසේ සිදුවිය එය,
සයිමන්
වන්නි අම්මාගේ
තන් පුඩු තොලගාමින්
කැඳවුයේ සාරයයි මහා පොළොවේ
සභ්‍යත්වයන් පෙරළා
ජීවිතයේ පෙළයි නෙළුවේ
දඩයක්කරුවන් මෙන්ම බෝධිසත්වයන් ගැනද
යුක්තියේ රිසිවරුද
රිසිවරයන්ගේ අතපසුවීමද
දේශපාලනයද කවියද
පැවැත්ම සහ චලනයද
අපහාසයද ලක්වූවන්ද එයට
උරා බිව් ඔහු
මෙසේද සටහන් කළේය:
'වසලයාද බ්‍රාහ්මණයාද ඔබමැයි --
එබැවින් රිසි සේ ජීවත්වනු මැන
ස්වර්ණවන්නියේද සිදාදියේද,
අපැහැදිලි මෙන්ම පැටලුනු නිවෙස් තුල --
අසඩක් නොවේය මම.'
"මා තනිව සිටියදී මම මගේම මිතුරිය වෙමි" -- සිබිල් වෙත්තසිංහ
මා තනිව සිටියදී
කුඩා දැරියක්
නියරක් දිගේ දිව විත්
ඇලක් තරණය කොට
දෑතේ එල්ලී
සෙල්ලම් ගෙවල් සහ පුච්චපු කොස් ඇට වලින්ම සැදුනු
තැඹිලි-දවස් වෙත කැඳවන්නී
තනිව සිටියදී
යුගයෙන් යුගයට යමි
කිසිදා මහළු නොවන දෑස් සොයමි
අත්තම්මාගේ ආදරය ද
අම්මාගේ ඔවදන් ද නෙලා ගනිමි
මැසිවිලි සහ කඳුළු අවසන
දැවටෙමි අහල පහළ
ඔවුන් ගේ දොර වැඩ වල
මා ඔවුන්ගේ ආරක්‍ෂිත දෑස් තුල
තනිව සිටියදී මා
විදෙස් බල පත්‍රය වීසි කරමි කැළණි ගඟට,
හංවැල්ලෙන් ගුවන් ගත වෙමි
එකතු වෙමි උද්ඝෝෂණ, රැස්වීම් සහ පාගමන් වලට
තේ කඩවල අල්ලාප සල්ලාප අතර
ඈත අතීතයෙන් එන අනාගතයට උරුම
ආදරවන්තයින්, ආදරය සහ රාගය
පිරිමදිමි, සිත්තම් කරමි
තනිව සිටියදී මා
දොලගලක් වෙමි පෙරළෙන
පාපැදියක දම්වැලෙන් ඝර්ෂණය සොයා ගනිමි
මෙතෙක් නොදුටු
රවී-ක්ෂිතිජ රංගන
රඟදක්වන තෙක්
ඉවසා සිටිමි.
හිස් කැටපතක් සහ ඔබගේ විනාසකාරී ගති පැවතුම්
ඇතොත් එකිනෙක මුණ ගැසෙන මොහොතක්
ඇරඹෙනු ඇත එතැනින් නිර්මාණකරණය
එයම වේ කැටයම ද කලාවද
පුරුදු වන්නට මැස්ම
ඇවැසිය ඉරුණු රෙදිකඩක්
ඇඳුම් මසන්නා ට
යළි යළිත් කැපිය යුතු වෙය
රුක් කඳ
ඉස්තරම් වඩු කම් පිණිස
ඇවැසිය බිඳුණු අස්ථියක්
වෙදකම් පිණිස වෙදදුරුට
නැගෙනු වස් කිත් යසස්
ඇවසිය ඔබේ නෙක ඇද කුද
-- ජලාල්උද්දින් රූමි
(පරිවර්තනය:මාලින්ද සෙනෙවිරත්න. සංස්කරණය: සුනන්ද කරුණාරත්න)
ආදරයෙන්ම පිරවූ බඳුනකි
වෛරයේ හලාහල විස බිඳු
එකතු වූයේ පසුවයි
ඒ ආදරණීය අරගලකරුවන්ද
ආදර වේශයෙන් ආ වෛරක්කාරයන් ද
සතුරා ද මිතුරා ද
මිතුරු වෙසින් ආ සතුරා ද
නොදනිමි
නොඅසමි
වෛරය ආදරයෙන් වෙලා ගත්තේ
ආදරයයි
ආදරයද ආදරයෙන් සිප ගත්තේ වෛරයයි
දියරයේ පැහැය වෙනස් වී ඇත
එහි සුවඳ ගිලිහී ගොසිනි
ආදරයද
වෛරයද
ආදරයේ නාමයෙන් වෛරයද
අමුවෙන්ම බඳුනට එකතු වේ
වඩා ගණකම් ආදරයද
වඩා ඝනකම් වෛරය ද
නොදනිමි!
නොඅසමි!
[ඇද කුද පෙන්වා දී වඩා සුමට ලෙස සංස්කරණය කළ මා මිත්‍ර සුනන්ද කරුණාරත්නට කෘතඥ වෙමි]
